२१ दिनभित्र देशभरिका विद्यालयहरूको भौतिक विवरण बुझाउन शिक्षामन्त्रीको पत्राचार
77 Views
काठमाडौँ, १९ चैत । शिक्षा, विज्ञान तथा प्रविधि मन्त्रालयले ७७ जिल्लाकै सार्वजनिक तथा सामुदायिक विद्यालयहरूको भौतिक विवरण पठाउन विद्यालयहरुलाई पत्राचार गरेको छ।
विद्यालयका जग्गा अतिक्रमणमा परेको, सार्वजनिक विद्यालयका जग्गा विभिन्न पक्षले हडपेको र पहुँचवालाहरूले दुरूपयोग गरिरहेको लगायतको गुनासो प्राप्त गरेपछि शिक्षा मन्त्री सुमना श्रेष्ठले देशभरीका विद्यालयको जग्गा विवरण उपलब्ध गराउन माग गर्नुभएको हो ।
स्थानीय तहको सहयोग र समन्वयमा सामुदायिक विद्यालयको नाम, ठेगाना, जग्गाको कित्ता नम्बर र क्षेत्रफल, विद्यालयको नाममा दर्ता भए नभएको विवरण तथा जग्गाको प्रयोगको अवस्थासहित लालपुर्जा, फिल्ड बुक र नक्सा समेतको विवरण २१ दिनभित्र मन्त्रालयमा पठाउन पत्राचार गरिएको मन्त्रालय स्रोतले बताउनु भयो ।
मन्त्रालयको तथ्यांक प्रणालीमा विद्यालयको भौतिक विवरण पूर्ण रूपमा समावेश नभएका कारण शैक्षिक नीति, योजना, कार्यक्रम र बजेट प्रणालीमा समस्या देखिएकाले विवरण तत्काल संकलन गर्न शिक्षा मन्त्री सुमना श्रेष्ठले निर्देशन दिनुभयो । शिक्षा तथा मानव स्रोत विकास केन्द्रको आइइएमआइएस अनलाईन प्रणाली सुदृढीकरण गरी थप विवरण व्यवस्थित बनाउने कार्य भइरहेको जनाएको छ ।
प्रतिक्रिया दिनुहोस