‘डम्फुको तालैमा’ तामाङ सेलो गित सार्वजनिक, दूधकुण्डा मेलाको परिवेशमा प्रेम र संस्कृतिको सुन्दर प्रस्तुति

काठमाडौं। तामाङ समुदायको मौलिक संस्कृति, प्रेम र सांगीतिक पहिचानलाई समेटिएको नयाँ तामाङ सेलो युगल गीत ‘डम्फुको तालैमा’ सार्वजनिक भएको छ। समाजसेवी तथा गीतकार तेन्जी पाख्रिनको शब्द, गायिका दिपा तामाङ र शुभ तामाङको सुमधुर युगल स्वर रहेको उक्त गीत “Pakhrin66 Official” युट्युब च्यानलमार्फत अडियो लिरिकल रूपमा सार्वजनिक गरिएको हो।

प्रसिद्ध दूधकुण्डा मेलाको रमाइलो परिवेशलाई आधार बनाएर तयार गरिएको गीतले एक च्याङ्बा र मैच्याङ्गबीचको पहिलो भेटदेखि सुरु भएको प्रेमकथालाई जीवन्त रूपमा चित्रण गरेको छ। मेलामा भएको आकस्मिक भेट, ठट्टा मजाक, जिस्क्याइ, भावनात्मक संवाद र एक अर्काप्रतिको आकर्षण क्रमशः विश्वास र गहिरो प्रेममा परिणत हुँदै जीवनभर साथ दिने प्रतिबद्धतासम्म पुग्ने कथालाई गीतले मिठासपूर्ण ढंगले प्रस्तुत गरेको छ।

गीतले प्रेमकथासँगै तामाङ समुदायको भाषा, भेषभूषा, डम्फुको ताल, सेलोको मौलिक लय र सांस्कृतिक जीवनशैलीलाई सुन्दर ढंगले उजागर गरेको छ। यसले मनोरञ्जनसँगै तामाङ समुदायको मौलिक पहिचानलाई नयाँ पुस्तामाझ परिचित गराउने सन्देश पनि बोकेको छ।

गीतमा च्याङ्बाले मैच्याङ्गको सौन्दर्य, सरलता र व्यवहारबाट प्रभावित हुँदै आफ्नो प्रेम व्यक्त गर्छ भने मैच्याङ्गले उसको माया, इमानदारी र विश्वासको परीक्षा लिएपछि अन्ततः प्रेम स्वीकार गर्छिन्। समाजका टीकाटिप्पणी र विभिन्न बाधा अड्चनलाई बेवास्ता गर्दै सँगै सुखद भविष्य निर्माण गर्ने प्रतिबद्धताले गीतलाई अझ हृदयस्पर्शी बनाएको छ।

गीतमा गायिका दिपा तामाङकै कम्पोज रहेको छ भने फनिन्द्र राईको संगीत तथा एरेन्ज रहेको छ। समूह स्वरमा महेन्द्र राई, सुसान लामा र बबिता पाख्रिनको साथले गीतलाई अझ आकर्षक बनाएको छ।

रोचक संयोग के छ भने, गायिका दिपा तामाङ स्वयं घिसिङ थरकी भएकाले गीतका केही शब्द, भाव र संवाद सुन्दा यो गीत उनैलाई केन्द्रमा राखेर सिर्जना गरिएको जस्तो आत्मीय अनुभूति हुन्छ। विशेषगरी च्याङ्बा मैच्याङ्गबीचको प्रेम संवाद र पात्रहरूको प्रस्तुतिले श्रोतामा गीत गायिकाकै जीवन वा व्यक्तित्वसँग नजिकिएको आभास दिलाउँछ। यद्यपि, यो गीतकारको आधिकारिक दाबी नभई गीत सुन्दा धेरै श्रोताले गर्न सक्ने स्वाभाविक अनुभूति मात्र हो। त्यसैले यसले गीतलाई अझ आत्मीय र यथार्थपरक बनाएको महसुस गराउँछ।

प्रेम, विश्वास, सांस्कृतिक गौरव र जीवनभरको साथलाई मुख्य विषय बनाइएको ‘डम्फुको तालैमा’ तामाङ सेलोले मौलिक संगीत रुचाउने श्रोता दर्शकमाझ विशेष स्थान बनाउने अपेक्षा गरिएको छ। दूधकुण्डा मेलाको सांस्कृतिक र रमाइलो परिवेशसँग प्रेमकथालाई जोडेर तयार गरिएको यो गीत तामाङ कला र संस्कृतिको संरक्षण तथा प्रवर्द्धनमा समेत महत्त्वपूर्ण योगदान पुर्‍याउने विश्वास गरिएको छ।