गायिका कमला दोङ र गायक प्रतीक मोक्तानको स्वरमा नयाँ तामाङ सेलो गीत ‘पेक्केङ पेक्केङ गो ह्योङ्सी’ सार्वजनिक

काठमाडौं – जनवादी गायिकाको रूपमा परिचित गायिका कमला दोङ र लोकप्रिय गायक तथा संगीतकार प्रतीक मोक्तानको स्वरमा सजिएको नयाँ तामाङ सेलो गीत ‘पेक्केङ पेक्केङ गो ह्योङ्सी’ सार्वजनिक भएएको छ। परम्परागत तामाङ सेलोको मौलिक लय र बोलमा आधुनिक प्रस्तुती मिसाइएको यो गीतले सांगीतिक बजारमा नयाँ उत्साह थपेको छ।

गीतका शब्द, संगीत र अवधारणा प्रतीक मोक्तानकै रहेको छ। अर्पण थिङको एरेञ्ज र दिपेश प्रधानको मिक्स–मास्टरिङसहित अर्पण स्टुडियोमा रेकर्ड गरिएको यो गीतमा तामाङ सेलोको भाका, लय र नृत्य शैलीलाई आधुनिक तालमेलमा प्रस्तुत गरिएको छ।

भिडियोमा प्रतीक मोक्तान, अनोज बम्जन, कुइसाङ रुम्बा, निशा घिसिङ र अस्मिता तामाङ लगायतका कलाकारहरुको सशक्त अभिनय देख्न सकिन्छ। मेकअप आर्टिस्टको रूपमा रेशम लामाको साथ, छायांकन तथा सम्पादन त्रिलोक लामा, र कोरियोग्राफी सञ्जीव ग्लेले गरेका छन्।

गीतको भिडियो राकेश मोक्तानको आधिकारिक युट्युब च्यानलमार्फत सार्वजनिक भएको हो। प्रकाशनको केही समयमै भिडियोले सामाजिक सञ्जालमा उल्लेखनीय ध्यान खिचेको छ। दर्शक–श्रोताले यसलाई मौलिक तामाङ सेलोलाई आधुनिक रूप दिने सफल प्रयास भन्दै प्रशंसा गरेका छन्।

कमला दोङ पछिल्ला वर्षमा एकपछि अर्को सफल गीत प्रस्तुत गर्दै आएकी छन्। ‘हेर्दैमा राम्री’, ‘कित्ताकित्तारि’, ‘टुङना’ र ‘डम्फू’ जस्ता गीतले व्यापक दर्शक–श्रोता मन जितेका छन्। उनको दमदार स्वर, स्पष्ट उच्चारण र भावपूर्ण गायन शैलीले उनलाई समकालीन तामाङ सेलो गायिकामध्ये अग्रपंक्तिमा उभ्याएको छ।

कमला दोङले यस गीतमार्फत पनि सांगीतिक यात्रामा आफ्नो प्रभावलाई अझ मजबुत बनाउने विश्वास व्यक्त गरेकी छन्। यस गीतले विशेष गरी तामाङ समुदायको सांस्कृतिक पहिचानलाई उजागर गर्ने र राष्ट्रिय संगीतमा मौलिकतालाई जोगाउने योगदान गर्ने अपेक्षा गरिएको छ।