उत्कृष्ट गोल गरेकी प्रीति राइको अपरेसन हुँदै, फाइनलमा भएकी थिइन् घाइते

२१ फागुन, काठमाडौं । नेपाली महिला टिमकी मिडफिल्डर प्रिती राईको घुँडाको शल्यक्रिया गर्नुपर्ने भएको छ ।प्रितीको ग्वार्कोस्थित बी एण्ड बी अस्पतालमा आज सोमबार शल्यक्रिया गर्न लागिएको छ ।

वाफ च्याम्पियनसिप अन्तर्गत फाइनलमा घुँडामा चोट बोकेकी उनको मिनिस्कस टियर भएको महिला टिमकी फिजियो नविना श्रेष्ठले जानकारी दिइन् ।

‘प्रितीको ल्याट्रल मिनिस्कस टियर भएको हो । लिगामेन्ट होइन । मिनिस्कस इन्जुरी ३ महिनामा ठिक हुन्छ’, उनले भनिन् ।

१९ वर्षीय प्रितीले सेमिफाइनलमा लेवनानविरुद्ध अन्तिम मिनेटमा गोल गर्दै नेपाललाई फाइनल पुर्‍याएकी थिइन् । ‘अप्रेसन धेरै ठूलो होइन । १५ देखि ३० मिनेट लाग्ने । रिहाब र फिजियो थेरापी गरेपछि उनी ३ महिनामा मैदानमा फर्कन्छिन्’, नवीनाले भनिन् ।