पोखरा महानगरपालिका वडा नं. ९ मा निर्माण भएको अन्तर्राष्ट्रिय झण्डा पार्कको आज उदघाटन

पोखरा महानगरपालिका वडा नं. ९ मा निर्माण भएको अन्तर्राष्ट्रिय झण्डा पार्कको आज उदघाटन गरिएको छ ।
लायन्स क्लब अन्तर्राष्ट्रिय डिस्ट्रिक्ट ३२५ आइ,जे,के,एल र एमको सहयोगमा उक्त पार्क निर्माण भएको हो । निर्माण भएको पार्कको उद्घाटन सोमबार बिहान पोखरा महानगरका प्रमुख धनराज आचार्य र लायन्स क्लब अन्तर्राष्ट्रियका निर्देशक बालकृष्ण बुर्लाकोटीले संयुक्त रुपमा उद्घाटन गरेका छन् ।

उद्घाटनसंगै पार्कको सम्पूर्ण स्वामित्व पोखरा महानगरलाई हस्तान्तरण भएको छ । झण्डा पार्क उद्घाटन तथा हस्तान्तरण समारोहमा लायन्स क्लब अन्तर्राष्ट्रियका निर्देशक बुर्लाकोटीले महानगर प्रमुख आचार्यलाई उक्त झण्डापार्कका साँचो हस्तान्तरण गरेका थिए।
पुस्तकालय र सार्वजनिक शौचालय हटाइएपछि खुल्ला भएको स्थानमा गरिएको अन्तर्राष्ट्रिय झण्डापार्क निर्माणमा लायन्स क्लबहरुले झण्डै ७० लाख रुपैयाँ खर्चिएको जनाइएको छ ।
झण्डापार्कमा संयुक्त राष्ट्र संघमा आवद्ध देशहरूका झण्डा राखिएका छन्। यी देशहरूका बीचमा लायन्स क्लब इन्टरनेशनलको झण्डा पनि राखेका छन्।

पोखराको विकासका लागि सहकार्य गर्न सबै संघसंस्थालाई आह्वान गरेका छन्। सरकार महानगर एक्लैको प्रयासले मात्र विकास सम्भव नभएको भन्दै झण्डा पार्क निर्माणमा लायन्स क्लव अन्तर्राष्ट्रियले सहयोग गरेजस्तै यहाँको पर्यटकीय एवं पूर्वाधार विकासमा समेत हातमालो गर्न उनले विकाशका लागि सहकार्यका लागि आह्वान गरेका हुन् ।

मेयर आचार्यले झण्डा पार्कसंगै व्यवस्थित पार्क, सौचालय, फल्चा, मड्का चिया सप, पत्रपत्रिका एवं डिजिटल डिसेप्ले लगायतका संरचना संगैरहने जानकारी दिए । उनले सहकार्यका लागि लयान्स क्लव अन्तर्राष्ट्रिय डिस्ट्रिक्ट ३२५ आइ, जे, के, एल र एम प्रति आभार प्रकट गरे ।

झण्डा पार्क हस्तान्तरण गर्दा संयुक्त राष्ट्रसंघको र लायन्स क्लवका संस्थापकको समेत सम्मान भएको उनले धारणा राखे ।
महानगरका प्रमुख प्रशासकीय अधिकृत स्यामकृष्ण थापाले झण्डा पार्क विश्वकै नयाँ प्रयोग भएको बताए । विश्वका सबै राष्ट्रको सार्बभौमलाई झण्डाले सम्मान गरेको उनको धारणा छ । झण्डा पार्कले विश्वाका जोसुकै मानिसका लागि यहाँ आउँदा देशप्रति सम्मानभाव प्रकट गराउने उनले उल्लेख गरेका छन् ।

कार्यक्रममा बोल्दै पोखरा महानगरका प्रमुख धनराज आचार्यले विश्वभरका झण्डा राखिएपछि महेन्द्रपुल पर्यटकीय गन्तव्य बनेको दाबी गरे। पोखरा आउने विभिन्न देशका पर्यटकले आफ्नो देशको झण्डामुनि बसेर फोटो खिच्ने उनको भनाइ छ।
झण्डा पार्कले विश्वबाट आउने पर्यटक र आन्तरिक पर्यटकलाई पनि आकर्षित गर्ने बताएका छन्। जोकोहीलाई पनि आफ्नो राष्ट्र र राष्ट्रियता प्यारो हुने भन्दै जोसुकैले पनि झण्डापार्कको अपनत्व महसुस गरेर आफ्नो राष्ट्रको स्मरण गर्ने उनको भनाई रहेकोछ ।

पोखरा–९ का वडा अध्यक्ष दीपेन्द्र मर्सानीले राम्रो झण्डापार्क बनाएर महानगरलाई हस्तान्तरण गरेकामा अन्तर्राष्ट्रिय लायन्स क्लवहरु प्रति आभार प्रकट गरेका थिए।उनले वडामा बनेको यो संरचना महानगरको गौरवपूर्ण सम्पत्ति बनेको बताएका छन्।
कार्यक्रममा महानगरमा दलका नेता दिवशमान प्रधान लगाएतले आआफ्नो धारणा राखेका थिए ।
पोखरा महानगरको २०७९ पुष १९ गते बसेको ८ औं कार्यपालिका बैठकले पुस्तकालय भत्काएर झण्डा पार्क बनाउने निर्णय गरेको थियो। उक्त निर्णयमा लायन्स क्लबलाई झण्डा पार्क बनाउन दिने निर्णय भने भएको जनाएको छ ।