गाउँ पर्यटन प्रबर्द्धन मञ्च नेपाल (भिटोफ) गण्डकी अध्यक्षमा शोमाकुमारी अधिकारी
56 Views
पोखरा । गाउँ पर्यटन प्रबर्द्धन मञ्च नेपाल (भिटोफ) गण्डकीको नवौं साधारणसभा तथा चौंथो अधिवेशनबाट शोभा अधिकारीको नेतृत्वमा नयाँ कार्यसमिति चयन भएका हो ।
मञ्चको प्रथम उपाध्यक्षमा रमेश अर्याल, द्वितीय उपाध्यक्षमा सुशीला भण्डारी, सचिवमा लक्ष्मण पहारी, कोषाध्यक्षमा शरण गुरुङ, सहसचिवमा विश्व क्षेत्री र सदस्यमा चिन्तामणि पोखरेल, भावना रानाभाट, विमल सापकोटा चयन भएका हुन् ।
निर्वाचन मण्डल संयोजक तारानाथ पहारी, सदस्य गोपाल थापा र रवीन्द्रराज पौडेल रहेको समितिले कास्कीको अर्मलाकोट सामुदायिक होमस्टे भिटोजले अधिवेशन गरेको हो ।
कार्यक्रममा गण्डकी प्रदेश सांसद प्रकाश बराल दैनिक जीवन सरल बनाउन होमस्टेले सहयोग गरेको बताए । होमस्टेले परम्परागत भाषा संस्कृतिलाई अन्तर्राष्ट्रिय जगतमा पु¥याउने उनको भनाइ थियो ।
पोखरालाई पर्यटनको राजधानी घोषण गर्न हतार गर्न नहुने प्रदेश सांसद बरालले बताए । ‘पर्यटन राजधानी घोषण गर्ने कुरा गम्भीर भएर गर्नुपर्छ । हतार गर्नुहुँदैन । राजधानी हुँदैमा पर्यटन आउने होइन । हतार गरेर फुर्सदमा पछुयाउनु हुँदैन,’ उनले भने ।
भिटोफ केन्द्रीय अध्यक्ष गोपाल थापाले कसरी गाउँ पर्यटनलाई बढावा दिने भनेर कार्यपत्र प्रस्तुत गरेका थिए ।
भिटोफ गण्डकीका अध्यक्ष उदय सुवेदीले गाउँ प्रवद्र्धनले धेरै होमस्टेलाई प्रवद्र्धन गरेको बताए । उनले भिटोफ नपुगेको होमस्टे नै नभएको दाबी गरे । गाउँको पर्यटनलाई प्रवद्र्धन गर्ने उद्देश्य नै गाउँ पर्यटन प्रवद्र्धन मञ्चको रहेको उनले सुनाए । ‘यो संस्थाको लिगेसी होमस्टेसँग छ, सँगसँगै गाउँका अन्य पर्यटकीय गन्तव्यलाई पनि बढावा दिने उद्देश्य हो,’ उनले भने, ‘कोभिडको बेलामा सबैतिर ठप्प हुँदा पनि हामीले यसको प्रचार गर्न रोकेनौं । त्यसबेला कास्की पर्वत र बागलुङमा ३ जिल्लामा एकैचोटि प्रबर्द्धन गरिएको थियो ।
ढोरपाटन र ताङतिङलाई पनि भिटोफले नै प्रमोट गरेको हो ।’ भिटोफ गण्डकीका निर्वतमान अध्यक्ष उदय सुवेदी, पूर्वअध्यक्ष नवराज अधिकारी, सल्लाहकार टीकाराम सापकोटा, रामजी शर्मा, उपाध्यक्ष शोभाकुमारी अधिकारी, पोखरा वडा नम्बर २१ का पूर्वअध्यक्ष खगराज आचार्य, अर्मला कोट होमस्टेकी अध्यक्ष बबिता गुरुङ, पोखरा महानगरपालिका पर्यटन विकास समितिका उपाध्यक्ष रवीन्द्रराज पौडेल र पोखरा पर्यटन परिषद्का उपाध्यक्ष कृष्ण भण्डारीले बोलेका थिए ।
प्रतिक्रिया दिनुहोस