अधिवक्ता पाण्डे काण्डमा ने.ता.घे.का महासचिव काजिमान थिङद्वारा राजीनामा

नेपाल तामाङ घेदुङ संघीय कार्यसमितिका महासचिव काजीमान थिङ तामाङले पदबाट राजीनामा दिएको छ ।

विवादित अभिव्यक्ति दिने अधिवक्ता भगवती पाण्डेलाई सहयोग गरेको स्वीकार गर्दै महासचिव थिङले सोमबार राजीनामा दिएको हो । उनले राजीनामापत्र अध्यक्ष मोहन गोले तामाङलाई बुझाईएको छ

‘भगवती पाण्डेको गैर जिम्मेवारीपूर्ण अभिव्यक्तिको विरुद्ध कारवाहीको माग राख्दै तामाङ र मगर समुदायद्वारा संचालित आन्दोलनको सन्दर्भमा म सँग जोडेर केही सामाजिक सञ्जालहरुमा भ्रामक गम्भीर आरोप लगाएकोले उक्त विषयमा तत्काल छानबिन गरी सत्यतथ्य बाहिर ल्याउन सहज वातावरण निर्माणको निम्ति नैतिक हिसाबले मैले नेपाल तामाङ घेदुङ संघीय कार्यसमितिको महासचिवको जिम्मेवारीबाट राजीनामा पेस गर्दछु ।’

महासचिव थिङले अभिवक्ता पाण्डेले गरेको गल्तीका निमित्त माफी माग्दा समावेश गर्नुपर्ने विषय सोध्दा विशेष अदालत बारका अध्यक्षलाई लिखित दिएको बताएको छ ।

‘अभियुक्त पाण्डे आबद्ध पेशागत संस्था विशेष अदालत बारका अध्यक्षले निज पाण्डेले माफी माग्दा समावेश गर्नुपर्ने समुदायको विषयहरुका सम्बन्धमा म सँग चासो व्यक्त गर्नु भएको थियो । त्यही सन्दर्भमा मैले सुझावको रुपमा समुदायको सरोकारका विषयहरु लेखित रुपमा विशेष अदालत बारका अध्यक्षलाई सुझाएको सत्य हो । यसबाहेक म प्रति आरोप लगाएको जस्तो कुनै पनि अन्य गतिविधिमा मेरो संलग्न नरहेको सवैमा स्पस्ट पार्न चाहन्छु,’ महासचिव थिङको विज्ञप्तिमा उल्लेख छ । संस्थाको जिम्मेवार व्यक्तिले उक्त संवेदनशील विषयमा आफूखुसी पत्र लेखिदिएको भन्दै सामाजिक सञ्जालमा उनको तीव्र आलोचना भइरहेको छ ।

साथै आफूमाथि आरोप लगाइएका विषयहरुमा घेदुङले निष्पक्ष एवं पारदर्शीरुपमा छानबिन गर्नुपर्ने पनि उनको माग रहेको छ ।आफ्नो कामबाट आन्दोलन, संस्था र समुदायमा कहींकतै क्षति पुगेको प्रमाणित भए जस्तोसुकै सजाय पनि भोग्न तयार भएको महासचिव तामाङले विज्ञप्तिमा उल्लेख गरिएको छ ।