साउदीमा यसरी ठगिन्छन् कम्पनीबाट नेपाली श्रमिकहरु

कास्की, ३० भदौ ।गत डेढ वर्ष अघिनै साउदी पुगेका २० जना नेपाली युवाहरु यतिबेला बेरोजगार भएका छन् । उनीहरूले चार महिनादेखि नत काम पाएका छन्, नत तलब पाएका छन् ।

एउटा कोठामा बन्दीजस्तै जीवन बिताउन बाध्य भएका छन् । उनीहरूलाई १५ दिनमा १०० रियाल खर्च दिएर राखिएको छ । सप्लायर्स कम्पनीमार्फत काम गर्दै आएका उनीहरु कम्पनीले काममा लगाउन नसकिने बताएपछि बिचल्लीमा परेको बताएका छन् ।अहिले उनीहरूलाई साउदीस्थित काउन्सुलर कार्यालयमा राखिएको छ ।

नेपालबाट जाँदा गरिएको सम्झौता अनुसार काम नपाएपछि उनिहारुले कम्पनीसँग जिज्ञासा राखेका थिए ।

खोटाङका उदय राईलाई वैदेशिक रोजगारीका लागि साउदी अरब पुगेको ३ महिनासम्म ठूलो भवनको एक अँध्यारो कोठामा राखियो । उनीसँगै अन्य १५ जना नेपाली र अन्य देशका केही कामदार पनि थिए । चौथो महिना लाग्दै गर्दा राईले काम पाए । तर, नेपालबाट भने अनुसारको काम उनलाई भएन ।त्यसपछि उनीहरु कम्पनीको निसानामा परे । र, उनलाई गाह्रो काममा लगाउन थालियो । काम गर्न नसक्ने भएपछि उनी ६ महिनामै नेपाल फर्किए । उनीसँगै गएका अन्य साथीसमेत कामै गर्न नसक्ने अवस्थामा पुगेको जनाएको छ ।