पृथ्वीचोक बसपार्कको ग्यारेज र मोटर पार्टस हटाए महानगरले

पोखरा महानगरपालिकाले पृथ्वीचोकको बसपार्कमा रहेका १ दर्जन बढी ग्यारेज र मोटर पार्टस हटाईएको छ ।

केहि महिना अगाडी देखिनै स्थानान्तरणका लागि समय दिएपनि अटेरी गरेकाले हटाएको महानगरको यातायात व्यवस्थापन समितिका सहसंयोजक अमृत शर्मा तिमिल्सिनाले बताएका छन् । “बसपार्ककै जग्गामा सञ्चालन भएकाले हटाएका छौं,हामी बसपार्क व्यवस्थापनको कामलाई तीव्रता दिइरहेका छौं ।”उनले भने ।

साउन पहिलो सातादेखि पोखरा महानगरले पृथ्वीचोकको सडकमा पार्किङ निषेध गर्दै बसपार्कमा यात्रु ओराल्ने चढाउनुपर्ने अनिवार्य गरेको छ । २ दिन बढी बसपार्कमा सवारी होल्ड गर्न नपाउने नियम रहेको छ ।

२०३२ सालदेखि बसपार्कको सपना देखाइए पनि अहिलेसम्म काम हुन सकेको छैन । पानी पर्दा हिलो र घाम लागेपछि धुलोले बसपार्क ढाकिन्छ ।

बसपार्कलाई व्यवस्थित गर्न शौचालय, काउन्टर, रेलिङ निर्माण लगायतको काम भइरहेको जनाएको छ । थप पूर्वाधार निर्माणको काम जुटेको महानगरले जनाएको छ ।