बाइकको पछाडि बस्नेलाई हेल्मेट अनिवार्य गर्न गृहकार्य बैठक
340 Views
काठमाडौं, १८ माघ । सरकारले मोटरसाइलसहित दुई पांग्रे सवारीसाधनको पछाडि बस्नेहरुले पनि हेल्मेट लगाउनुपर्ने व्यवस्था कार्यान्वयन गर्न छलफल थालेको छ । उपप्रधानमन्त्री एवं भौतिक पूर्वाधार तथा यातायात मन्त्री नारायणकाजी श्रेष्ठको अध्यक्षतामा मन्त्रालयमा भएकाे बैठमा यस्तो नियम लागू गर्नेबारे छलफल भएको हो ।
मोटरसाइकल र स्कुटरमा पछाडि बस्ने यात्रु र साइकल यात्रुले हेल्मेट नलगाउँदा दुर्घटना पर्दा ठूलो समस्या भोग्ने गरेका छन् । कतिको त ज्यान नै जाने गरेको छ । जोखिमलाई न्यूनीकरणका लागि भौतिक पूर्वाधार तथा यातायात मन्त्रालयमा भएको छलफलमा यसबारे चासो राख्ने विभिन्न सरकारी र सामाजिक निकाय तथा ब्यक्तित्वहरूको उपस्थिति थियो ।
सवारी तथा यातायात ब्यबस्था ऐन २०४९ को दफा १३० को उपदफा २ मा लेखिएको छ, ‘दुई पाङ्ग्रे सवारी चलाउदा चालकले तथा सो सवारीमा बस्ने मानिसले सुरक्षा टोप (हेल्मेट) लगाउनुपर्छ ।’
उपप्रधानमन्त्री श्रेष्ठले नागरिक स्वयम्ले हेल्मेटले दिने सुरक्षाको महत्व बुझ्नुपर्ने भएकोले यसका लागि जनचेतनामुलक कार्यक्रम जरुरी भएको बताएका हुन् ।
प्रतिक्रिया दिनुहोस