लोकप्रिय सञ्चारकर्मी रवि लामिछाने आगामी संसदीय चुनावमा काठमाडौंबाट स्वतन्त्र उम्मेदवार बन्ने

काठमाडौँ, असार २ खोज मिडिया । लोकप्रिय सञ्चारकर्मी रवि लामिछाने आगामी संसदीय चुनावमा काठमाडौंबाट स्वतन्त्र उम्मेदवार बन्ने भएका छन् । उनी आजै ग्यालेक्सी टेलिभिजनबाट बिदा भएका हुन् ।

लामिछानेले काठमाडौंको कुन निर्वाचन क्षेत्रबाट लड्ने भन्ने चाहिँ अन्तिम टुंगो लागिसकेको छैन । तर, उनले ३ नम्बर क्षेत्र रोज्ने सम्भावना प्रवल रहेको स्रोतले बताए । यद्यपि, निकटस्थहरूले १ नम्बर र ५ नम्बर पनि सुझाइरहेका छन् ।

लामिछाने आजै ग्यालेक्सी टिभीबाट बिदाई भएका छन् । टिभीका अध्यक्ष जिवी राईले लामिछानेलाई खादा लगाएर औपचारिक विदाइ गरे । लामिछाने सो टिभीका संस्थापक तथा प्रस्तोता थिए । रवीले चलाउने कार्यक्रम सिधा कुरा जनतासँगको अन्तिम एपिसोड आज बेलुकी ७ बजे प्रसारण हुँदैछ । उनले आफ्नो कार्यक्रम युवराज कँडेललाई हस्तान्तरण गरेको बुझिएको छ । कँडेल उक्त कार्यक्रममा भ्वाइस ओभर गर्ने गर्थे ।

राष्ट्रिय प्रजातन्त्र पार्टी (राप्रपा)का प्रवक्ता ज्ञानेन्द्र शाहीले लोकप्रिय सञ्चारकर्मी रवि लामिछानेलाई राजनीतिमा स्वागत गरेका छन् । उनले अवश्य पनि तपाइँ हामीले सोचेको भ्रष्टाचारमुक्त नेपाल हामी सबै मिलेर बनाउनु पर्छ भन्दै शुभकामना दिएका हुन् ।

उनले सामाजिक सञ्जालमा लेखेका छन्, ‘हार्दिक स्वागत छ आदरणीय दाजु राजनीतिकमा…अबश्य तपाईं हामिले सोचेको ,सुन्दर शान्त , भ्रष्टाचारमुक्त नेपाल। हाम्रै पालामा हामी सबै मिलेर बनाउनु छ।’

लामिछानेले राजनीतिमा प्रवेश गर्न ग्यालेक्सी टेलिभिजनबाट बिदा भएका छन् । गायक शिव परियारले पनि चर्चित सञ्चारकर्मी रवि लामिछानेलाई शुभकामना दिएका छन् ।