भरतपुरमा आज गठबन्धनको चुनावी सभा

काठमाडौं, २२ वैशाख खोज मिडिया । सत्तारूढ गठबन्धनले बिहीबार चितवनको भरतपुरमा चुनावी सभा गर्ने भएको छ।

सभालाई प्रधानमन्त्री एवं नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल (प्रचण्ड)र एकीकृत समाजवादीका अध्यक्ष माधवकुमार नेपालसहितका नेताहरूले सम्बोधन गर्ने कार्यक्रम रहेको छ। सभामा सहभागी हुन प्रधानमन्त्री देउवा र कांग्रेस वरिष्ठ नेता रामचन्द्र पौडेल बुधबार नै चितवन पुगिसकेका छन्।

भरतपुर महानगरपालिकाको मेयरमा गठबन्धनका तर्फबाट माओवादी केन्द्रकी रेणु दाहाल र उपमेयरमा नेपाली कांग्रेसका चित्रसेन अधिकारी उम्मेदवार छन्। यो क्षेत्रमा कांग्रेसका पुराना नेता जगन्नाथ पौडेलले स्वतन्त्र उम्मेदवारी दिएका छन् भने एमालेको तर्फबाट विजय सुवेदी मैदानमा छन्।

पौडेलको उम्मेदवारी फिर्ता गराउन गृहमन्त्री बालकृष्ण खाणसहितका कांग्रेस नेताहरू चितवन पुगेपनि सफल हुन सकेका थिएनन्। पौडेललको उम्मेदवारीले सत्ता गठबन्धनलाई चुनौती थपिएको छ।