निर्देशक विक्रम भट्टले गरे दोस्रो विवाह

काठमाडौं, खोज मिडिया २० असोज । भारतीय फिल्मका चर्चित निर्देशक विक्रम भट्टले दोस्रो विवाह गरेका छन् । भारतीय मिडियाले उल्लेख गरेकाअनुसार विक्रमकी कान्छी पत्नीको नाम श्वेताम्बरी सोनी हो । विक्रमले श्वेताम्बरीसँग गत वर्ष नै विवाह गरेका थिए । तर, उनले दोस्रो विवाह लुकाउँदै आएका थिए ।

दोस्रो बिहेबारे विक्रमले बताउन नचाहे पनि उनका निकटवर्तीले भने विक्रमले दोेस्रो विवाह गरेको पुष्टि गरेका छन् । अहिले विक्रमसँगको उनकी कान्छी पत्नीको एउटा पोस्ट सामाजिक सञ्जालमा निकै सेयर भइरहेको छ ।

विक्रमले यसअघि आदिति भट्टसँग बिहे गरेका थिए । उनीहरूको एक छोरी कृष्णा छिन् । उनीहरुले सन् १९९८ मा सम्बन्ध बिच्छेद गरेका थिए । त्यसपछि विक्रम केही वर्षसम्म नायिका सुस्मिता सेन र अमिषा पटेलसँग अफेयरमा रहे । अमिषा त विक्रमसँग केही वर्ष लिभ इन रिलेसनसिपमा बसेको समेत खबर आएको थियो ।