विद्युत् प्राधिकरणका कार्यकारी निर्देशक कुलमान घिसिङले देशैभर चलाउदैछन्, अब यस्तो अभियान

रोमन लामा
रामेछाप ६ भाद्र खोज मिडिया। दोस्रो कार्यकालको सुरुवातीसँगै उज्यालो नेपालका नायक, नेपाल विद्युत् प्राधिकरणका कार्यकारी निर्देशक कुलमान घिसिङले सहरी सौन्दर्यलाई वृद्धि गर्नका खातिर ‘उज्यालो र सफाइ सहर अभियान’ चलाउने भएका छन्। उज्यालो सहर अभियान अन्तर्गत नगरपालिकाहरूसँगको समन्वय र सहकार्यमा मुख्य सडक, ऐतिहासिक तथा  सांस्कृतिक सम्पदाहरू, विश्व सम्पदा सूचीमा सूचीकृत तथा पर्यटकीय स्थानहरूमा सजावटयुक्त आधुनिक बत्ती (स्मार्ट लाइट) जडान गरिनेछ।

यो खाले कार्यबाट सहरको सौन्दर्य वृद्धि हुने, विद्युत् माग बढ्ने र रातिको खेर जाने विद्युत् पनि खपत हुने प्राधिकरणका कार्यकारी निर्देशक कुलमान घिसिङले बताए। साथै, सफाइ अभियानअन्तर्गत मुख्य तथा सहायक सडकहरूमा रहेका प्रयोगविहीन अनावश्यक विद्युतीय पोल तथा तारहरू हटाउने, तारहरूलाई भूमिगत गर्ने लगायत कामहरु अगाडि बढाउने उनले बताए।

पहिलो चरण अन्तर्गत  उज्यालो र सफाइ सहर अभियान काठमाडौं उपत्यका, भरतपुर एवं पर्यटकीय पोखरा महानगरपालिकामा चलाइने र त्यस पछि विस्तार गर्दै देशभरि नै सञ्चालन गरिने प्राधिकरणले जनाएको छ। प्राधिकरणले अहिले काठमाडौं उपत्यकाको विद्युत् वितरण प्रणालीलाई भूमिगत बनाउन काठमाडौंको रत्नपार्क र महाराजगन्ज वितरण केन्द्र अन्तर्गतका क्षेत्रमा काम गरिरहेको छ।

दोस्रो चरण अन्तर्गत काठमाडौंका बाँकी रहेका ठाउँहरू, ललितपुर, भक्तपुर, पोखरा, भरतपुरको तार भूमिगत गर्ने कार्य अगाडि बढाइने प्राधिकरणले जनाएको छ।