सालनालमा ट्युमर हुँदा गर्भ रहेजस्तै लक्षण देखिनसक्छ (डा. जितेन्द्र परियार)

काठमाडौँ , खोज मिडिया ३० साउन । महिलामा प्राय गर्भ बस्दा सामान्य रूपमा बच्चाको वृद्धि विकास हुन्छ । बच्चा विकसित भएपछि डेलीभरीको क्रम पनि सामान्य हुनसक्छ। तर कतिपय अवस्थामा बच्चाको वृद्धि विकास भन्दा पनि साल मात्रै बढेर त्यसमा ट्युमर फैलिएको हुनसक्छ। जसलाई (मोलर प्रिगनेन्स) भनिन्छ। यसलाई सालको ट्युमर भनेर पनि बुझ्न सकिन्छ । जुन गर्भवती महिलामा हुनसक्छ।

सालनालको ट्यूमरका धेरै अनुमानित कारण छन् । धेरै भात खाने समुदायमा यस्तो समस्या पनि बढी हुन्छ भन्ने मान्यता छ। बच्चा बन्ने क्रममा डिम्बा र शुक्रकिटको मिलनपछि भ्रुण बन्छ। यो बढ्दै गएपछि जुन (नर्मल) बच्चा बन्नुपर्ने हुन्छ। तर क्रोमोजोममै डिफेक्ट छ भने सालनालमा ट्युमर हुनसक्छ।

यो विशेष गरेर २० वर्षको उमेर वरपरका महिला र ३५-४० कटेका महिलाहरू पहिलोपटक गर्भवती भएको बेलामा हुनसक्छ। अथवा ४० वर्षपछि गर्भ बसेको छ भने पनि यस्तो हुनसक्छ । सालनालमा ट्युमर भए नभएको भिडिओ एक्सरे गरेर थाहा पाउन सकिन्छ। पाठेघरको परीक्षण गरेपछि पनि थाहा हुन्छ।

मोलर प्रिगनेन्स सामान्य गर्भवतीलाई जस्तै हुन्छ। तर पेट सामान्य भन्दा ठूलो हुन्छ। यस्तो बेलामा महिनावारी रोकिएपछि र गर्भ रहेको अनुमानित लक्षण चिन्ह सुरू भएपछि रक्तश्राप हुनसक्छ। रक्तश्राप हुँदा अंगुरको झुप्पा जस्तो जान सक्छ। त्यस्तो बेलामा सालनालको ट्युमर हुनसक्छ।

गर्भ रहेको छ भनेर पिसाप परीक्षण गराउँदैमा सामान्य गर्भ हुन्छ भन्ने हुँदैन । यस्तो घ ट्ना यदाकदा देखिन्छन्। हजारदेखि पन्ध्र सय गर्भमा एउटा गर्भ यस्तो हुनसक्छ। देश हेरेर यसको तथ्यांक फरक छ।

क्यान्सर र नन क्यान्सर गरि सालनालको ट्युमर २ चरणका हुन्छन्। यो बढ्दै गयो भने क्यान्सरको रूप लिन्छ। यदि मोलर प्रिगनेन्सकीको उचित उपचार हुन सकेन भने रक्तश्राप र सं क्रमणको जटिलता देखिन्छ। कतिपय अवस्थामा ज्यान अफ्ठेरोमा पर्नसक्छ।

शुक्रकिटको खराबीले गर्दा पनि यस्तो जटिलता आउने अध्ययनले देखाएको छ। पाठेघर सफा गरियो भने ४ देखि ६ महिनाको निगरानीमा अधिकांश (मोलर प्रिगनेन्सी) पूर्ण ठिक हुन्छ। तर ५ देखि २० प्रतिशत भने क्यान्सरमा परिणत हुनसक्छ।

पोलर प्रेग्नेन्सीको विषयमा केन्द्रित रहेर निजामती कर्मचारी (सिभिल) अस्पताल र क्यान्सर केयर अस्पताल, जावलाखेलमा कार्यरत स्त्री क्यान्सर रोग विशेषज्ञ डा.जितेन्द्र परियार ले बताएका छन ।