आयोगका उपाध्यक्षलाई भेटेर विद्यार्थी संगठनले भने!फेरि प्रवेश परीक्षा लिनुपर्‍यो,

काठमाडौँ , खोज मिडिया २९ साउन । सत्तारूढ विद्यार्थी संगठनका नेताहरूले चिकित्सा शिक्षा आयोगका उपाध्यक्ष श्रीकृष्ण गिरीलाई भेटेर मेडिकल र पारामेडिकलको प्रवेश परीक्षा फेरि लिन माग गरेका छन्। आज उपाध्यक्ष गिरीलाई भेटेर उनीहरूले तत्काल अर्को प्रवेश परीक्षा लिन माग गरेका हुन् ।

“यसअघि लिइएका परीक्षामा सिट क्षमताभन्दा कम संख्यामा विद्यार्थी उत्तीर्ण भएका छन् ।” नेविसंघ महामन्त्री दीपक भट्टराईले भने! “यसले विद्यार्थीलाई विदेश गएर पढ्न प्रोत्साहन गर्छ ! बाध्य बनाउँछ , यो प्रवृत्ति रोक्न पनि फेरि प्रवेश परीक्षा लिनुपर्छ भन्ने हाम्रो माग छ ।

तत्कालै प्रवेश परीक्षा लिई सिट संख्याअनुसार भर्ना गर्ने वातावरण तयार बनाउन पनि उपाध्यक्ष गिरीको ध्यानाकर्षण गरिएको उनले बताए । शुक्रबार आयोग कार्यालय पुगेर विद्यार्थी संगठनहरूले ज्ञापन पत्र नै बुझाएका छन् । आयोगले हालै लिएको प्रवेश परीक्षामा मेडिकलमा कोटाभन्दा धेरै विद्यार्थी उत्तीर्ण भए पनि पारामेडिकलमा भने कम विद्यार्थी उत्तीर्ण भएका थिए।

यसले स्वास्थ्य क्षेत्रको जनशक्ति उत्पादन र विद्यार्थीहरूको पढ्ने चाहनामा गम्भीर असर पर्ने पनि विद्यार्थी संगठनहरूको भनाइ छ। नेपाल विद्यार्थी संघ, अनेरास्ववियु, अनेरास्ववियु (क्रान्तिकारी), अखिल (छैटौँ) र समाजवादी विद्यार्थी युनियनले आयोग उपाध्यक्ष गिरीलाई भेटेर तत्काल फेरि प्रवेश परीक्षा लिन माग गरेका हुन् । आयोगका उपाध्यक्ष गिरीले विद्यार्थी संगठनका मागमा आफू सकारात्मक भए पनि आयोगको नियमअनुसार मात्रै अगाडि बढ्न सकिने प्रतिक्रिया दिएका थिए ।