कम्युनिष्ट विचारधारा बोकेका ६ वटा राजनीतिक दलका ७ जना शीर्ष नेताहरूले एउटै मञ्चबाट सम्बोधन गर्दै

काठमाडौं, ८ साउन, खोज मिडिया । कम्युनिष्ट विचारधारा बोकेका फरक–फरक ६ वटा राजनीतिक दलका ७ जना शीर्ष नेताहरूले आज एउटै मञ्चबाट सम्बोधन गर्ने भएका छन् ।

पुष्‍पलाल मित्रता केन्द्रको आयोजनामा आज शुक्रबार आयोजना हुने कार्यक्रममा उनीहरू एउटै मञ्चमा देखिने भएका हुन् ।
कार्यक्रममा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, एमाले नेता माधवकुमार नेपाल, नेकपा महासचिव नेत्रविक्रम चन्द, क्रान्तिकारी माओवादीका अध्यक्ष मोहन वैद्य ‘किरण’ र राष्ट्रिय जनमोर्चाका अध्यक्ष चित्रबहादुर केसी, नेकपा संयुक्तका अध्यक्ष चन्द्रदेव जोशी र एमालेकै महिला नेतृ अष्टलक्ष्मी शाक्यले एउटै मञ्चबाट सम्बोधन गर्न लागेका हुन् ।

नेपाली कम्युनिष्ट आन्दोलनको वर्तमान संकट र आगामी बाटो विषयक प्रवचनसहित श्रद्धान्जली कार्यक्रम हुने आयोजकले जनाएको छ । तुल्सीलाल स्मृति प्रतिष्ठानको कार्यलयमा हुने कार्यक्रममा नेकपा एमालेका अध्यक्ष केपी शर्मा ओलीलाई भने निमन्त्रणा गरिएको छैन ।