विवाह भोजमा सहभागी ३५ जनामा को*रोना सं*क्रमण पुष्टि, टोलभरि नै सं*क्रमण देखिएपछि उक्त क्षेत्रलाई सिल

बागलुङ, ९ असार, खोज मिडिया । दुई साताअघि बागलुङ नगरपालिका–३ खोलाखेत टोलमा विवाह भोजमा सहभागी ३५ जनामा मंगलबार को*रोना सं*क्रमण पुष्टि भएको छ ।

भोज खाएको केही दिनपछि को*रोनासँग मिल्दोजुल्दो लक्षण देखिएपछि नगरपालिकाले ५० जनाको पीसीआर परीक्षण गराएको थियो । नगर स्वास्थ्य शाखाका प्रमुख रामप्रसाद खनालले अधिकांश लक्षणसहितका सं*क्रमित भएको बताए ।
निषेधाज्ञाको समयमा पनि धुमधामले भोज लगाएका रहेछन्, उनले भने, सदरमुकाम नजिकै भएकाले बजारवासीसमेत त्र*सित छन् । खोला खेतवासीले भने विवाहमा आफ्नै परिवार र टोलवासी मात्रै रहेको दाबी गरेका छन् । संक्रमण कसरी फैलियो भन्नेमा उनीहरूसमेत अन्योलमा छन् ।

टोलभरि नै सं*क्रमण देखिएपछि प्रशासन र नगरपालिकाले उक्त क्षेत्रलाई सिल गर्ने तयारी गरेको वडाध्यक्ष लक्ष्मी बाँस्कोटाले बताइन् । ‘सं*क्रमितलाई बाहिर जान आउन नदिने, बरु अत्यावश्यक सेवा वडाले पठाउने गरी काम हुँदै छ,’ उनले भनिन्, ‘सिंगो बजारलाई जोखिम हुने गरी आउजाउ गर्न दिइने छैन ।’ सं*क्रमित सबैलाई होम आइसोलेसनमा राखिनेछ । जटिल समस्या भएमा तत्काल अस्पताल ल्याउने गरी व्यवस्थापन भएको समेत उनले जानकारी दिइन् ।

यसअघि गत जेठ पहिलो साता बागलुङकै बडिगाड गाउँपालिकामा विवाहको भोज खाँदा वडा नम्बर ४ मा एकै परिवारका ४ जनासहित ७ को मृत्यु भएको थियो । बागलुङकै बलेवा क्षेत्रमा पनि विवाह, चौरासी पूजालगायत पर्व मनाउँदा सबैभन्दा धेरै सं*क्रमित भेटिएका थिए ।बागलुङ–३ बाट वडा ८ मा जन्ती गएका गाडी प्रहरीले नियन्त्रणमा समेत लिएको थियो । निषेधाज्ञाकै समयमा यो टोलमा पनि विवाह उत्सव गरिएपछि सं*क्रमित बढेका हुन् ।

चेन ब्रेकका लागि पहल भइरहेको थियो, जानेबुझेकाले नै विवाह भोज गरिदिएपछि फेरि जोखिम भयो, स्वास्थ्य शाखा प्रमुख खनालले भने, सबै जागरुक नभएसम्म संक्रमणबाट मुक्त हुन सकिँदैन । कतिपय पालिकामा भने कडाइ गरेकै कारण चेन ब्रेक र सं*क्रमण मुक्तसमेत भएका छन् । कान्तिपुर दैनिकमा यो समाचार छ ।