मुलुकभर पछिल्लो २४ घण्टामा ८ हजार २०३ जना नयाँ कोरोना संक्रमित फेला

काठमाडौं जेठ ४, खोज मिडिया। नेपालमा पछिल्लो समय दिनप्रति दिन कोरोना संक्रमितहरू तीब्र रुपमा बढिरहेका छन् । मुलुकभर पछिल्लो २४ घण्टामा ८ हजार २०३ जना नयाँ कोरोना संक्रमित फेला परेका छन् ।
स्वास्थ्य तथा जनसंख्या मन्त्रालयका अनुसार मुलुकभर २० हजार ९७९ जनाको पीसीआर–एन्टिजेन परीक्षण ८ हजार २०३ जनामा कोरोना संक्रमण पुष्टि भएको हो । २० हजार २८६ जनाको आरटी–पीसीआर परीक्षण गर्दा ८ हजार १३६ र ६ सय ९३ जनाको एन्टिजेन परीक्षण गर्दा ६७ जनामा कोरोना संक्रमण पुष्टि भएको हो । पछिल्लो २४ घण्टामा मुलुकभर ८ हजार२०३ जना नयाँ संक्रमित थपिएसँगै कुल संक्रमितको संख्या ४ लाख ७२ हजार ३५४ पुगेको छ ।

पछिल्लो २४ घण्टामा ६ हजार ८९१ संक्रमित निको भए, १ सय ९६ को मृत्यु

कोरोना भाइरस कोभिड–१९ को संक्रमणबाट पछिल्लो २४ घण्टामा देशभर ६ हजार ८९१ जना निको भएर घर फर्किएका छन् । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभरबाट ६ हजार ८९१ जना निको हुँदा डिस्चार्ज हुनेहरुको कुल संख्या ३ लाख ५२ हजार ४१४ पुगेको छ । यसैगरी क्वारेन्टाइनमा रहनेको संख्या ७ सय ५२ रहेको छ । पछिल्लो २४ घण्टामा देशभर २० हजार ९७९ जनाको पीसीआर–एन्टिजेन परीक्षण हुँदा हालसम्म कुल २८ लाख १२ हजार ९५९ जनाको पीसीआर–एन्टिजेन परीक्षण भएको छ ।
यसै गरी पछिल्लो २४ घण्टामा थप १ सय ९६ संक्रमितको मृत्यु भएको छ । हालसम्म नेपालमा कोरोना संक्रमणबाट मृत्यु हुनेको संख्या ५ हजार ४११ पुगेको छ ।