अन्य विद्यालयले पनि सिक्ने पो हो कि राकाथुम मा.वि. सँग

रामेछाप १६ माघ खोज मिडिया। रामेछाप जिल्लाको सदरमुकामबाट बि.पी. राजमार्ग हुदैँ यात्रा तय गर्ने हो भने लगभग ३ घण्टामा आई  पुगिने सुन्दर गाउँ राकाथुम हो।  जुन गाउँ साबिकको राकाथुम गा.वि.स. हालको खाँडादेवी गाउँपालिकाको वडा नं १ मा पर्दछ।  यहिँ गाउँमा श्री माध्यमिक विद्यालय राकाथुम अवस्थित छ । श्री माध्यमिक विद्यालय राकाथुममा नै सो वडा नं  १ को विद्यालयहरुको स्रोत केन्द्र पनि स्थापना गरेको छ।  सो १ नं वडामा पछिल्ला वर्षहरुमा शैक्षिक उन्नयनका गतिविधिहरु प्रसस्त मात्रैमा भएको देख्न र सुन्न सकिन्छ।  त्यहाँको शैक्षिक उन्नयनको बाटोमा लागि पर्न त्यस ठाउँको स्थानीय जनताहरु र जनप्रतिनिधिहरुको देन पनि एकदम उल्लेखनिय छ। सो वडा नं १ मा वडा शिक्षा समिती नै निर्माण गरी शैक्षिक उन्नयनका खातिर जोडतोडका साथ लागि परेको छ।

                     यस्तै कार्यको उदाहरण स्वरुप आज पनि  सहिद दिवसको अवसर पारी उक्त वडा नं १ को ५ ओटा विद्यालयहरुको कक्षा ३ मा अध्ययन गर्ने २५ जना विद्यार्थीहरु र कक्षा ५ मा अध्ययन गर्ने ४८ जना विद्यार्थीहरुले आज गणित विषयको परिक्षा स्रोत केन्द्र रहेको श्री माध्यमिक विद्यालय राकाथुममा भएको परिक्षामा सरिक भएको छ। आजको परिक्षामा श्री माध्यमिक विद्यालय, श्री बागेश्वरी आधारभूत विद्यालय , श्री गोपी आधारभूत विद्यालय , श्री भगवती आधारभूत विद्यालय , श्री खाँडादेवी आधारभूत विद्यालय  गरि जम्मा ५ ओटा विद्यालयहरुले सहभागिता जनाएको छ।  श्री दुधेश्वरी आधारभूत विद्यालय, बेलघारी र श्री  कालीदेवी आधारभूत विद्यालय, कोथवेले भने भौगोलिक दुरीको हिसाबले टाढा भएकोले आज भएको परिक्षामा सहभागी हुन् सकेन।  ति दुई विद्यालयको कक्षा ३ र ५ मा अध्ययन गर्ने विद्यार्थीहरुलाई यहिँ मङ्गलबार आफु अध्ययनरत विद्यालयमा नै परिक्षा दिन पाउने जानकारी स्रोत शिक्षक/मा.वि. राकाथुमका प्र.अ. चक्रलाल श्रेष्ठले खोज मिडियालाई  जानकारी दिनुभयो।

                      आजको परिक्षा कार्यक्रममा कक्षा ३ को तर्फ प्रथम श्री माध्यमिक विद्यालय राकाथुम , द्धितिय श्री माध्यमिक विद्यालय राकाथुम र श्री गोपी आधारभुत विद्यालय खानीगाउँ , तृतीय श्री माध्यमिक विद्यालय राकाथुम तथा सान्त्वना श्री माध्यमिक विद्यालय राकाथुम भएको छ। त्यसै गरी कक्षा ५ तर्फ प्रथम , द्धितिय र तृतीय तिनै स्थान श्री गोपी आधारभुत विद्यालय खानीगाउँ तथा सान्त्वना श्री माध्यमिक विद्यालय राकाथुम भएको छ। परिक्षामा सहभागिता जनाई प्रथम , द्धितिय , तृतीय र  सान्त्वना स्थान ओगटने विद्यार्थीहरुलाई सो वडाको वडा अध्यक्ष विष्णु कुमार श्रेष्ठले नगदको साथमा कापी र कलम  पुरुस्कार वितरण गर्नु भयो।

सोहि क्रममा  वडा नं १ राकाथुमका स्रोत शिक्षक/मा.वि. राकाथुमका प्र.अ. चक्रलाल श्रेष्ठले श्री माध्यमिक विद्यालय राकाथुममा प्रारम्भिक बाल विकास कक्षा , कक्षा ९ , कक्षा ११ र कक्षा १२ को प्रत्येक शुक्रवार दिउँसो २ बजे देखि  साप्ताहिक परिक्षा लिने र कक्षा १० को प्रत्येक शनिवार ७ बजे परिक्षा लिने गरेको छ जानकारी दिनु  भयो।