१४ सय ७७ जनालाई खोप लगाउँदै रामेछापमा कोरोना विरुद्धको खोप अभियानको सुरुवात

रोमन लामा
रामेछाप १४ माघ खोज मिडिया।
आजबाट सुरु हुने कोरोना विरुद्धको खोप अभियान अन्तर्गत प्रधानमन्त्री केपी शर्मा ओलीले आज बिहान भर्चुअल माध्यमबाट खोप अभियानको सुभारम्भ गर्नुभएको हो । कोरोना विरुद्दको खोप अभियान अन्तर्गत आज देखि रामेछाप जिल्लामा पनि कोरोना विरुद्धको खोप लगाउने कार्यको थालनी भएको छ। खोप अभियानको सुरुवात जिल्ला अस्पताल रामेछापका डाक्टर रोशन ग्वाछा र स्वास्थ्य कार्यालय रामेछापका प्रमुख जितेन्द्र कुमार कर्णले खोप लगाउँदै गर्नुभयो। जनमानसमा खोपका बारेमा धेरै भ्रम भएकोले खोप सुरक्षित रहेको सन्देश दिन डाक्टर रोशन ग्वाछा र स्वास्थ्य कार्यालय रामेछापका प्रमुख जितेन्द्र कुमार कर्णले पहिलो खोप लगाएको उहाँहरुले बताउनुभयो ।

रामेछाप जिल्लामा कोरोना विरुद्धको खोप लगाउन १४ सय ७७ जनाले नाम दर्ता गराएका छन । सो खोपको लक्षित वर्गमा सरकारी तथा निजि स्वास्थ्यकर्मी, महिला स्वास्थ्य स्वयंसेविका, एम्बुलेन्स चालक,  शव व्यवस्थापनमा  खट्ने सुरक्षाकर्मी र तथा सरसफाईकर्मी रहेका छन।  काठमाडौ उपत्यकाका १७ ओटा सहित देशभर १ सय २० ओटा केन्द्रबाट खोप उपलब्ध गराउने स्वास्थ्य तथा जनसंख्या मन्त्रायले जनाएको छ । सो खोप भारत सरकारको अनुदानमा माघ ८ गते १० लाख मात्रा खोप नेपाल ल्याइएको हो । पहिलो चरणको खोप अभियान सुरु गरेको १० दिनभित्र अभियान सम्पन्न गर्नेछ। कोरोना विरुद्धको खोप अभियानको पहिलो चरणमा ४,३०,००० जनालाई खोप दिइने मन्त्रालयले जनाएको छ ।