शिक्षक सेवा आयोगले तालिका अनुसार नै विज्ञापन अनुसार नै खुल्ला तर्फको विज्ञापन खुलाउने तयारी

रोमन लामा (क्षितिज)
रामेछाप २६ मङ्सिर मार्गशिर्ष खोज मिडिया। शिक्षक सेवा आयोगले केहि हप्ता अघि तयार पारेको कार्य तालिका अनुसार नै मंसिर मार्गशिर्ष  महिना भित्रमा नै खुला तर्फको अनलाइन आवेदन खोल्ने तयारी गरेको छ । शिक्षक सेवा आयोगले तयार पारेको कार्य तालिका अनुसार खुला तर्फको विज्ञापन मंसिर भित्रमा नै अनलाइन फारम भर्न मिल्ने गरी खोल्ने तयारी भइरहेको जानकारी आयोगको अध्यक्ष मधु प्रसाद रेग्मीले खोज मिडियासँग बताउनु भयो। शिक्षक सेवा आयोगको अध्यक्ष रेग्मीले भने “हामी अनलाइन  मार्फत आवेदन दिनको लागि तयारी गरेको सफ्टवेयरको परीक्षण गरिरहेका छौं । कार्य तालिका भित्रै नै विज्ञापन खोल्छौं ।’

आधुनिक प्रविधिको उच्चतम प्रयोगसँगै सबैका लागि सहज बनाउने उद्देश्यका साथ अनलाइन विज्ञापन खोल्ने तयारी गरेको आयोगको अध्यक्ष रेग्मीको भनाइ छ । आयोगको कार्य तालिका अनुसार खुला विज्ञापनको सामान्य परीक्षा आगामी फाल्गुण महिनामा, विषयगत परीक्षा आगामी जेष्ठ महिनामा हुनेछ । सामान्य परीक्षाको नतिजा २०७९ वैशाख महिनामा र विषयगत तर्फको परीक्षाको नतिजा २०७९ श्रावण  महिनामा प्रकाशन गर्ने आयोगको कार्यतालिका छ । तत्पश्चात भाद्र महिनामा नै अन्तर्वार्ता गरी आश्विन महिनामा शिक्षक सिफारिस गर्ने आयोगले बताएको छ । प्राथमिक तहका शिक्षकको सिफारिस भने कार्तिक महिनामा हुनेछ । यस अनुसार आगामी शैक्षिक वर्षको मध्यम ताकातिर नयाँ शिक्षकहरु विद्यालयमा पुग्नेछन् ।

झन्डै सात लाख जना भन्दा बढीले शिक्षण अध्यापन अनुमति पत्र लिएको आयोगले जनाएको छ । आयोगका अनुसार हाल सम्म प्राथमिक तहमा दुई लाख दुई हजार ७१२ जनाले, निम्न माध्यामिक तहमा तीन लाख सत्तरी हजार १२ जनाले र माध्यामिक तहमा एक लाख ४४ हजार तीन सय ८१ जना गरी सात लाख १७ हजार एक सय पाँच जनाले शिक्षण अध्यापन अनुमति पत्र लिएका छन् । आयोगले खुलातर्फ माध्यामिक तहमा एक हजार ४२ दरबन्दी, निम्न माध्यामिक तहमा एक हजार ९१३ दरबन्दी र प्राथमिक तहमा नौ हजार ६०१ रिक्त दरबन्दीमा विज्ञापन खुलाउने तयारी गरेको छ ।