प्राध्यापक मियाँको ‘मैले देखेको कतार’ सार्वजनिक

काठमाडौं, १६ कात्तिक खोज मिडिया ।
१५ वर्षे कतार बसाईँको अनुभव समेटिएको प्राध्यापक डा.मोहम्मद रमजान अलि मियाको ‘मैले देखेको कतार’ पुस्तक सार्वजनिक भएको छ ।

सोमबार उपराष्ट्रपति नन्दबहादुर पुनले हरित गृह लैनचौरस्थित उपराष्ट्रपतिको कार्यालयको हातामा रहेको सभाहलमा पुस्तक सार्वजनिक गरे ।

उपराष्ट्रपति पुनले पुस्तकमा लेखकले नेपाल र कतारको कुटनैतिक, आर्थिकलगायत सम्बन्ध र नेपाली कामदारले कतारलाई समृद्ध बनाउन गरेको योगदानको चर्चा गरेको बताए । कतारबारे जान्न चाहनेलाई यो पुस्तक उपयोगी हुने उनको भनाइ छ ।

मुस्लिम आयोगका अध्यक्ष शमिम मिया अन्सारीले लेखक मिया कतारमा रहेका नेपाली श्रमिक तथा आम नेपालीका सुखदुःखका साथी भएको बताए ।

पुस्तकमा कतारमा रहेका नेपालीको इतिहास, नेपाली श्रमिकको योगदान, कतारको इतिहास र बिस्तृत परिचय नेपाल कतारबीच सम्भावना भएका दर्जनौं बिषय समेटिएको लेखक मियाँले बताए ।

लेखकको यो ३७औँ कृति हो । कतारबारे मात्रै उनले १० वटा पुस्तक प्रकाशन गरिसकेका छन् ।