रौतहटमा भारतबाट आएर क्वारेन्टाइनमा बस्ने थपिए २६ संक्रमित

१२ जेठ । रौतहटमा थप २६ जनामा कोरोना संक्रमण पुष्टि भएको छ । जिल्लाका राजपुर तथा ईशनाथ नगरपालिकाका २६ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

आज पुष्टि भएका सबै सम्बन्धित नगरपालिकाका क्वारेन्टाइननमा बस्नेहरु रहेको स्थानीय प्रशासनले जानकारी दिएको छ । संक्रमितमध्ये २४ जना राजपुर र २ जना ईशनाथ नगरपालिकाका रहेका छन् । उनीहरू सबै भारतबाटै भित्रिएका हुन् । भारतका विभिन्न सहर हुँदै रौतहट आएका उनीहरुलाई सम्बन्धित पालिकाले क्वारेन्टाइमा राखेर स्वाब परीक्षणका लागि पठाएको थियो । कुल १ सय २३ जनाको परीक्षणको गरिएकाेमा २६ जनामा संक्रमण देखिएको प्रमुख जिल्ला अधिकारी वासुदेव घिमिरेले जानकारी दिनुभयो ।

उहाँका अनुसार संक्रमति सबैको स्वास्थ्य स्थिति सामान्य रहेको छ । अहिले उनीहरुलाई राजपुर नगरपालिकाको स्वास्थ्य चौकीको आइसोलेसनमा राखेर उपचार गर्ने तयारी भइरहेको छ । यसअघि जिल्लामा पुष्टि भएका १८ जनालाई गौर नगरपालिका स्थित नर्सिङ्ग क्याम्पसको आइसोलेसनमा राखेर उपचार भइरहेको छ । यसअघि जिल्लाका ३ जना संक्रमितहरु भने वीरगन्ज स्थित नारायणी उपक्षेत्रिय अस्पतालमा उपचार पश्चात निको भएर घर फर्किसकेका छन् ।