धरानमा पहिलो पटक भेटिए संक्रमित २ जनामा कोरोना संक्रमण

७ जेठ । प्रदेश १ मा कोरोना संक्रमितको संख्या ६६ पुगेको छ भने वुधवार मात्र ७ जनामा कोरोना संक्रमण देखिएको छ ।

विराटनगर स्थित प्रदेश जनस्वास्थ्य प्रयोगशालामा गरिएको परीक्षणमा झापाका ५ जना र वीपी कोइराला स्वास्थ्य विज्ञान प्रतिष्ठान धरानमा गरिएको प्रयोगशालमा धनकुटाका १ र धरानका १ जनालाई कोरोना पोजिटिभ देखिएको सामाजिक मन्त्रालय स्रोतले बताएको छ ।

धरानमा देखिएको यो पहिलो केस हो । धनकुटा र धरानमा संक्रमित भेटिनु अघि आज दिउसो झापाको कचनकवलमा ५ जनामा संक्रमणको पुष्टि भएको थियो ।

प्रदेश १ मा कोरोना टेष्टको दायरा बढेसँगै संक्रमितको संख्या पनि दिनहुँ थपिन थालेको छ । १ नं. प्रदेशमा तीन ठाउँबाट पीसीआर परीक्षण भइरहेको छ ।

मुख्यमन्त्री तथा मन्त्रिपरिषद् कार्यालय मातहतको कोरोना सूचना डेस्ककाअनुसार बुधबारसम्म पीसीआरबाट ३ हजार सात सय ७ जनाको परीक्षण भएको छ । आरडीटीबाट ९ हजार ८ सय ३७ जनाको परीक्षण भएको छ ।

कोरोन संक्रमीतको सख्या बढे संगै प्रदेशका विभिन्न अस्पतालहरुलाई तयारी अवस्थामा राखिएको छ भने विराटनगरस्थित कोभिड उपचार केन्द्रमा संक्रमितहरुको उपचार गरीदै आएको छ ।

विराटनगरस्थित कोभिड उपचार केन्द्रबाट वुधवारसम्म २६ जना कोरोना मुक्त भएर गइसकेका छन् ।