स्वदेशमै जम्न थाले रिटर्नी माइग्रेन्टहरु । सरकार र बैंकबाट भने उपेक्षा ।

रामप्रसाद ढुंगेल, २३ माघ

एक दशक जतिको युएई बसाईलाई बिट मारेर नेपाल फर्किएका काभ्रेका उत्तम बिक झापाका दीर्घराज भट्टराई र लछुमन काफ्ले यतिबेला विदेशमा भन्दा बढी आम्दामी गरिरहेका छन् ।

तीनै जना एक वर्षको अन्तरमा फरकफरक समयमा नेपाल फर्किएर कृषि व्यावसायमा सामुहिक लगानी गरी जम्न थालेका हुन् । नवज्योति कृषि फर्म नामको एउटा कम्पनी दर्ता गरेर काभ्रेको बनेपा नगरपालिका-१ टुकुचामा कुखुरा, बाख्रा, तरकारी खेती शुरु गरेका उनीहरु यतिबेला मासिक २ देखि ४ लाख रुपैयाँसम्म आम्दानी गरिरहेका छन् । २ हजार लेयर्स कुखुरा पालेका उनीहरूले अहिलेसम्म ३० लाख लगानी गरेका छन् । उक्त नवज्योती कृषि फर्ममा अहिले तीनजना कामदारलाई रोजगार समेत दिईएको फर्मका प्रोपाईटर उत्तम बिकले जानकारी दिएका छन् ।

कृषिमा आधारित व्यावसायमा तन, मन र धन लगाएर आफै खटिएर काम गरे स्वदेशमै राम्रो आम्दानी हुने र वैदेशिक रोजगारको लागि म्यानपावर कम्पनीको ढोका ढकढकाउन नपर्ने रहेछ भन्दै बिकले भने, “हामीले सही समयमा यो काम शुरु गरेछौ । अहिले बजारमा अन्डा, मासुको भाउ बढेको छ । हाम्रो उत्पादन पनि शुरु भएको छ । त्यसकारण हामीले शुरु गरेको ब्यबसायबाट राम्रो आम्दानी हुन थालेको छ ।” युएइमा रहदा झापाली समाज हुँदै एनआरएनए युएईको केन्द्रीय तहमा पुगेर सामाजिक अभियानमा सक्रिय भएका हाल नवज्योति कृषि फार्मका अर्का संचालक लछुमन काफ्ले भन्छन्, “दस बर्षे बिदेश बसाईमा भन्दा अहिले धेरै खुसी, सफलता र उपलब्धि मिलेको छ ।” १० वर्षको लागि २० रोपनी जग्गा लिजमा लिएर शुरु गरिएको उक्त ब्यबसायलाई आगामी दिनहरुमा बढाउदै करोडौको कारोबार सहित नमुना कृषि फर्म बनाउदै धेरैलाई रोजगार दिने लक्ष्य रहेको उक्त कृषि फर्मको अर्का पार्टनर दीर्घराज भट्टराईले बताए ।

वैदेशिक रोजगारमा रहेको बेला देखि नै योजना बनाएर नेपाल फर्किएका उनीहरु आफ्नो ब्यबसायमा सन्तुष्ट छन् । विभिन्न अनलाईन र समाचारपत्रहरुमा लेखिएको/देखिएको जस्तो नेपाल सरकारको कृषि प्रतिको चासो र लगानीमा भने भनिएजस्तो सजिलो नभएको र निकै झन्झटिलो भएको उनीहरुको गुनासो रहेको छ । सरकारको नीति र नियमप्रति एकरुपता छैन । ठुलाठुला सभामा मन्त्री, नेताहरुले भाषण गरेको सुन्दा सबै कुरा तत्काल नै भैहाल्छ जस्तो देखिन्छ तर सम्बन्धित निकायमा पुग्दा त्यो सबै भ्रम रहेछ भन्ने लाग्छ ।

सरकारको कृषिमा लगानी भन्ने नीति ठिक छ तर कार्यान्वयन गराउन सकेको देखिन्न । यदि सरकार र सम्बन्धित निकाय किसानप्रति जिम्मेवार हुने हो र सच्चा किसान चिनेर लगानी गर्ने हो भने स्वदेशको उत्पादनमा आत्मनिर्भर हुने पक्का छ । किसानलाई राज्यले ऋण उपलब्ध गराउने र निश्चित कर राज्यलाई बुझाउने नियम लगाउने हो भने समृद्ध नेपालको सरकारको परिकल्पना साकार हुनेमा दुईमत नभएको उनीहरुको भनाइ छ । एनएमबी बैक र रिटर्नी माइग्रेट नेपाल संस्थाले भने जस्तो तरिकाले रिन उपलब्ध नगराएकोमा उनीहरूको दुखेसो छ । आफुहरु वास्तविक फार्म संचालक साथै रिटर्नी माइग्रेट नेपाल संस्थाको सदस्य भएर पनि हालसम्म समाचारमा आएजसरी रिन नपाएकोमा नवज्योति कृषि फारमका संचालकले दुखेसो प्रकट गरेका छन् ।