सुशासन र समृद्धिको एजेन्डासहित काभ्रे–२ मा ज्योत्सना सैंजुको उम्मेदवारी

काभ्रे । प्रतिनिधिसभा क्षेत्र नं. २ काभ्रेमा यसपटकको निर्वाचन केवल दलहरूको प्रतिस्पर्धा मात्र नभई नयाँ र पुराना राजनीतिक धारबीचको परीक्षणका रूपमा हेरिएको छ। यही प्रतिस्पर्धाबीच उज्यालो नेपाल पार्टीकी केन्द्रीय सदस्य तथा पर्यटन व्यवसायी ई. ज्योत्सना सैंजुले आफ्नो उम्मेदवारी प्रस्तुत गरेकी छन्।

बनेपा नगरपालिका वडा नं. ७ निवासी ज्योत्सना सैंजु होटल एशोसियसन काभ्रेको उपाध्यक्ष तथा होटल प्रिन्सिसेसकी सञ्चालक हुन्। आइटी इन्जिनियरिङ पृष्ठभूमि भएकी सैंजु सामाजिक तथा व्यावसायिक क्षेत्रमा सक्रिय रहँदै आएकी छन्। रोटरी क्लब अफ धुलिखेल, महिला उद्यमी मञ्च, सहकारी अभियान लगायत संस्थामा नेतृत्वदायी भूमिका निर्वाह गरिसकेकी सैंजुले अहिले राजनीतिक मैदान रोजेकी छन्। तीन महिनाअघि मात्रै स्थापना भएको उज्यालो नेपाल पार्टीबाट उनी केन्द्रीय सदस्यको जिम्मेवारीमा रहेकी छन्। पार्टीका अध्यक्ष पूर्व ऊर्जा क्षेत्रका कार्यसम्पादनका लागि चर्चित कुलमान घिसिङ हुन्। पार्टीले सुशासन, समृद्धि र सामाजिक न्यायलाई मूल एजेन्डा बनाएको दाबी गर्दै आएको छ।

सैंजुले २०८२ माघ १० गते उम्मेदवारी दर्ता गराएकी हुन् । काभ्रे–२ मा उनीसहित २४ जना उम्मेदवार चुनावी प्रतिस्पर्धामा छन्। कांग्रेसका मधु आचार्य, एमालेका अशोक व्याञ्जु, नेकपाकी बसुन्धरा हुमागाईँ र रास्वपाका बदन भण्डारी जस्ता स्थापित दलका उम्मेदवारहरू मैदानमा हुँदा सैंजुले नयाँ शक्तिको प्रतिनिधित्व गर्दै आफूलाई विकल्पका रूपमा प्रस्तुत गरेकी छन्। उनका अनुसार विगत तीन दशकभन्दा बढी समयदेखि सत्तामा रहेका ठूला दलहरूले जनअपेक्षा पूरा गर्न नसकेको, राजनीतिक अस्थिरता र सुशासन अभावले नागरिक निराश बनेको अवस्था छ। ३६ वर्षमा ३० वटा सरकार परिवर्तन भएको तथ्य उल्लेख गर्दै उनले स्थायित्व र नीतिगत सुधारको आवश्यकता औंल्याएकी छन्।

पर्यटन क्षेत्रलाई नेपालको मुख्य आयस्रोत बनाउने उनको प्रतिबद्धता छ। नेपाल विश्वका सुन्दर देशमध्ये एक रहेको, वार्षिक करिब ११ लाख विदेशी पर्यटक आगमन भइरहेको अवस्थामा त्यसलाई उल्लेख्य रूपमा वृद्धि गर्न सकिने उनको भनाइ छ। भारत र चीन जस्ता विशाल जनसंख्या भएका मुलुकबाट मात्र १ प्रतिशत पर्यटक आकर्षित गर्न सकिए पनि ठूलो आर्थिक अवसर सिर्जना हुने उनको तर्क छ। हवाई सुरक्षालाई अन्तर्राष्ट्रिय मापदण्डअनुसार सुदृढ बनाउँदै प्रत्यक्ष अन्तर्राष्ट्रिय उडान विस्तार, पर्यटन ऐन संशोधन, काभ्रेलाई पर्यटनमैत्री क्षेत्रका रूपमा विकास गर्ने योजना उनले अघि सारेकी छन्। ऊर्जा उत्पादनमा १० वर्षभित्र २० हजार मेगावाट लक्ष्यसहित सुनकोशी तेस्रो जस्ता आयोजनालाई प्राथमिकता दिनुपर्ने उनको धारणा छ।

कृषिमा आधुनिकीकरण, मल–बीउको सहज उपलब्धता, उत्पादनमा आत्मनिर्भरता र विपी तथा अरनिको राजमार्गका निर्माणाधीन सडक चाँडो सम्पन्न गर्न भूमिका खेल्ने प्रतिबद्धता उनले व्यक्त गरेकी छन्। आगामी फागुन २१ गते हुने निर्वाचनमा सैंजुले प्रत्यक्षतर्फ ‘चिम’ र समानुपातिकतर्फ ‘बाँसुरी’ चुनाव चिन्हमा मतदान गर्न मतदातालाई आग्रह गरेकी छन्।

काभ्रे–२ मा यसपटकको निर्वाचन परिणामले नयाँ राजनीतिक शक्ति र स्थापित दलबीच जनमतको झुकाव कता रहन्छ भन्ने संकेत दिनेछ।