ईसिडी शिक्षकलाई प्रा.वि. शिक्षक सरहको तलब दिन मन्त्रालयमा छलफल सुरू

रोमन लामा
रामेछाप २४ फाल्गुण खोज मिडिया। शिक्षा विज्ञान तथा प्रविधि मन्त्रालयले प्रारम्भिक बालबिकास स.का. (ईसिडी) शिक्षकलाई कम्तीमा प्राथामिक तहको शिक्षक सरहको तलव दिन छलफल गरिरहेको जानकारी दिएको छ । शिक्षा मन्त्रालयबाट अहिले बनाई रहेको रणनीति, मापदण्ड र निर्देशिका आदि कार्यहरुमा अर्थ मन्त्रालयको सहमति जनाउनका लागि मन्त्रालयले ल्याउने हरेक डकुमेन्टमा तलबको हकमा कम्तिमा आधारभूत तहको प्राथामिक तहको शिक्षक सरह बनाउन मन्त्रालय लागि परेको शिक्षा मन्त्रालय स्रोतले जानकारी दिएको छ ।

शिक्षा विज्ञान तथा प्रविधि मन्त्रालय स्रोतका अनुसार प्रारम्भिक बालबिकास स.का. (ईसिडी) शिक्षकलाई प्राथामिक तहको शिक्षक सरहको तलब भत्ता प्रदान गर्नका लागि कक्षा १२ पास गरेको शैक्षिक योग्यता हुनुपर्ने र नयाँ नियुक्त हुने शिक्षकको हकमा मात्रै यो नियम लागु हुनेछ।  तर प्रारम्भिक बालबिकास स.का. (ईसिडी) शिक्षकका रुपमा हाल कार्यरत शिक्षकहरुलाई भने यो लागु नहुने पनि मन्त्रालय स्रोतले जनाएको छ । लामो समय देखि प्रारम्भिक बालबिकास स.का. (ईसिडी) का शिक्षकहरुले श्रम ऐन अनुसार पनि पारिश्रमिक नपाएको र न्युन पारिश्रमिकमा काम गर्नु परेको गुनासो गर्दै आईरहेका छन् । हाल देशभरमा करीब ३२,००० प्रारम्भिक वालविकास कक्षा सहयोगी शिक्षक रहेका छन् ।